លោក ត្រាំ ថា ការចរចាជាមួយអ៊ីរ៉ង់កំពុងដំណើរការយ៉ាងលឿន ទោះមានការគំរាមកំហែងពង្រីកសង្គ្រាមក៏ដោយ
ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃចន្ទ ១ មិថុនា ថា ការចរចាជាមួយអ៊ីរ៉ង់កំពុងដំណើរការក្នុងល្បឿនលឿន ទោះទីក្រុងតេអេរ៉ង់បានគំរាមកំហែងពង្រីកសង្គ្រាមដោយបន្តបិទច្រកសមុទ្រ Hormuz និងធ្វើឱ្យចំណុចសម្ពាធផ្សេងទៀតនៅជុំវិញតំបន់នេះមានភាពច្របូកច្របល់ក៏ដោយ។
ទីភ្នាក់ងារសារព័ត៌មានអ៊ីរ៉ង់ Tasnim បានរាយការណ៍ថា ទីក្រុងតេអេរ៉ង់បានផ្អាកការសន្ទនាជាមួយក្រុមអ្នកសម្របសម្រួល ដើម្បីតវ៉ាប្រឆាំងនឹងការពង្រីកការវាយលុករបស់អ៊ីស្រាអែលនៅក្នុងប្រទេសលីបង់ ជាទីដែលសម្ព័ន្ធមិត្តអាមេរិកមួយនេះ បានគំរាមវាយប្រហារម្តងទៀតលើតំបន់ជាយក្រុងភាគខាងត្បូងនៃទីក្រុងបេរូត។
ក្រោយមក លោក Trump បាននិយាយថា លោកបានបញ្ចុះបញ្ចូលអ៊ីស្រាអែល និងក្រុមហេសបូឡា គាំទ្រដោយអ៊ីរ៉ង់ឱ្យបន្ថូរបន្ថយភាពតានតឹង ដោយស្ថានទូតអាមេរិកប្រចាំនៅប្រទេសលីបង់បាននិយាយថា ក្រុមសកម្មប្រយុទ្ធបានទទួលយកសំណើរបស់សហរដ្ឋអាមេរិកសម្រាប់ការបញ្ឈប់ការវាយប្រហារទៅវិញទៅមក។
លោក Trump បានបង្ហោះនៅលើប្រព័ន្ធផ្សព្វផ្សាយសង្គមថា ការចរចាកំពុងបន្ត ក្នុងល្បឿនយ៉ាងលឿន ជាមួយសាធារណរដ្ឋអ៊ីស្លាមអ៊ីរ៉ង់។
គួរបញ្ជាក់ថា ការចរចាដោយប្រយោលរវាងសហរដ្ឋអាមេរិក និងអ៊ីរ៉ង់ ការគំរាមកំហែង និងការវាយប្រហារតាមអាកាសអស់រយៈពេលជាច្រើនសប្តាហ៍ បានបរាជ័យក្នុងការបញ្ចប់សង្គ្រាម ឬបើកច្រកសមុទ្រ Hormuz ឡើងវិញ ដែលជាច្រកដឹកជញ្ជូនដ៏សំខាន់សម្រាប់ប្រេង និងឧស្ម័ននៅឈូងសមុទ្រពែក្ស។
ប្រភព៖BTV News International
