លោកត្រាំគំរាមយកពន្ធគយបារាំងដល់២០០% ក្រោយការបដិសេធរបស់លោកអេមម៉ានុយអែលម៉ាក្រុង មិនព្រមចូលរួមក្នុងក្រុមប្រឹក្សាសន្តិភាព

ប្រធានាធិបតីអាមេរិក លោកដូណាល់ត្រាំ កាលពីថ្ងៃទី១៩ មករា បានគំរាមយកពន្ធគយដល់២០០%លើស្រាសំប៉ាញរបស់បារាំង ជាការឆ្លើយតបចំពោះការបដិសេធរបស់លោកអេមម៉ានុយអែលម៉ាក្រុង មិនព្រមចូលរួមក្នុងក្រុមប្រឹក្សាសន្តិភាពសម្រាប់ជ្រោយហ្គាហ្សារបស់លោក ។

នៅមុខបណ្ដាអ្នកកាសែតនៅផ្លរីដា លោកត្រាំថ្លែងថា ខ្ញុំនឹងយកពន្ធគយ២០០%លើស្រាបារាំង ពិសេសស្រាសំប៉ាញ បើមិនចូលរួមក្នុងប្រឹក្សានោះទេ ។ ចំណែកបណ្ដាអ្នកនៅអមប្រធានាធិបតីបារាំងគូសបញ្ជាក់ កាលពីថ្ងៃទី១៩ មករា ថា ក្នុងដំណាក់កាលនេះ បារាំងនៅមិនទាន់យល់ស្របតាមសំណើនោះនៅឡើយទេ ។

គោលដៅនៃការបង្កើតក្រុមប្រឹក្សាសន្តិភាពរបស់លោកដូណាល់ត្រាំ ត្រូវបានគេមើលឃើញ ថា មិនមែនត្រឹមដោះស្រាយបញ្ចប់ជម្លោះនៅជ្រោយហ្គាហ្សាប៉ុណ្ណោះទេ តែលោកចង់ក្ដាប់ក្នុងដៃដំណោះស្រាយជម្លោះនានានៅលើពិភពលោក ជាការប្រកួតប្រជែងគ្នាជាមួយក្រុមប្រឹក្សាសន្តិសុខអ.ស.ប ដោយអ្នកចង់បានក្លាយជាសមាជិកអចិន្ត្រៃយ៍ក្រុមប្រឹក្សានោះ ត្រូវបង់ប្រាក់១ពាន់លានដុល្លារ តាមធម្មនុញ្ញរបស់ក្រុមប្រឹក្សានេះ៕