ជាប្រវត្តិសាសស្ត្រដំបូងរបស់ប្រទេសម៉ារ៉ុកដែលបានផលិតនូវរថយន្តដ៏កម្រមួយរបស់ពិភពលោកយ៉ាងជោគជ័យដែលវាជាប្រភេទរថយន្តដើរដោយថាមពលអ៊ីដ្រូសែន ដោយបានដាក់សម្ពោធកាលពីពេលថ្មីៗនេះនិងត្រៀមដាក់ឱ្យប្រើប្រាស់នៅឆ្នាំ២០២៥

ម៉ារុក៖ ស្តេច Mohammed VI របស់ប្រទេសម៉ារ៉ុក បានយាងសម្ពោធនូវរថយន្តដ៏ស្រស់ស្អាតមួយ ដែលវាជាប្រភេទរថយន្តកម្រដើរដោយថាមពលអ៊ីដ្រូសែន ឈ្មោះថា Hydrogen Utility Vehicle ឬ HUV ដែលបានដាក់សម្ពោធកាលពីពេលថ្មីៗនេះនិងត្រៀមដាក់ឱ្យប្រើប្រាស់នៅឆ្នាំ២០២៥។ សម្រាប់រថយន្តនេះត្រូវបានបង្កើតឡើងដោយក្រុមហ៊ុនរថយន្តដំបូងបង្អស់របស់ម៉ារ៉ុក 100% Neo Motors និងសហការជាមួយក្រុមហ៊ុនរថយន្ត NamX ដែលមានមូលដ្ឋាននៅទីក្រុងប៉ារីស។

ក្នុងនោះសម្រាប់រថយន្តដែលដោយថាមពលអ៊ីដ្រូសែននេះ វាមានលក្ខណៈពិសេសជាច្រើនក្នុងការផ្តល់ជូននូវធុងអ៊ីដ្រូសែនដែលអាចផ្លាស់ប្តូរបានចំនួន ៥ធុង និងផ្តល់ចម្ងាយយ៉ាងលឿនរហូតដល់ 800 គីឡូម៉ែត្រ ដោយប្រព័ន្ធទាំងអស់នេះធ្វើឱ្យមានភាពងាយស្រួលក្នុងការផ្លាស់ក្នុងពេលធ្វើដំណើរ។ នេះបើតាមការចុះផ្សាយដោយសារព៍ត៌មាន Al-Monitor កាលពីពេលកន្លងទៅ។

នាយកប្រតិបត្តិក្រុមហ៊ុន Neo Motors នៃប្រទេសម៉ារ៉ុក លោក Nassim Belkhayat សហការជាមួយប្រធានក្រុមហ៊ុន NamX នៃប្រទេសបារាំង លោក Faouzi Annajah បានឱ្យដឹងថា ជាប្រវត្តិសាសស្ត្រដំបូងហើយរបស់ប្រទេសម៉ារ៉ុកដែលបានផលិតនូវរថយន្តដ៏កម្រមួយរបស់ពិភពលោកយ៉ាងជោគជ័យដែលប្រភេទរថយន្តនេះវាពិតជាមានការផលិតបានតិចតួចណាស់នៅលើពិភពលោក ដោយសារវាមានបច្ចេកទេសនិងលក្ខណៈពិសេសជាច្រើនដែលជាតម្រូវការដ៏ចាំបាច់របស់មនុស្សនាពេលបច្ចុប្បន្ន។

ប្រភពដដែលបានបន្តថា ប្រភេទរថយន្តដើរដោយថាមពលអ៊ីដ្រូសែន ឈ្មោះថា Hydrogen Utility Vehicle ឬ HUV នេះ វាមានភាពអស្ចារ្យលើសរថយន្តដ៏ទៃជាពិសេសវាមិនដូចរថយន្តអគ្គិសនីដែលចំណាយពេលច្រើនម៉ោងក្នុងការសាកថ្មនោះទេ ដោយវាត្រូវការតែប៉ុន្មាននាទីប៉ុណ្ណោះក្នុងការបំពេញនូវឥន្ធនៈនៃចំហាយទឹកអ៊ីដ្រូសែន ដែលមិនត្រូវការប្រើប្រាស់នូវការបញ្ចេញកាបូនពីយានយន្តមិនដូចរថយន្តអគ្គីសនីនោះទេ។

គួរជម្រាបថា ក្រុមហ៊ុន Neo Motors នៃប្រទេសម៉ារ៉ុក គឺជាក្រុមហ៊ុនមួយដែលផលិតរថយន្តធំជាងគេនៅទ្វីបអាហ្រ្វិក សម្រាប់ទីផ្សារក្នុងស្រុក និងសម្រាប់ការនាំចេញទៅប្រទេសផ្សេងៗ។ ក្នុងនោះវាជាជោគជ័យដំបូងហើយដែលក្រុមហ៊ុននេះអាចផលិតរថយន្តដើរដោយថាមពលអ៊ីដ្រូសែនបានយ៉ាងជោគជ័យ ដែលភាគច្រើនគេឃើញមានរត្តមានរថយន្តនេះនៅតែប្រទេសអាមេរិកជាមួយចំនួនជាងមួយមុឺនគ្រឿងប៉ុណ្ណោះនៅលើពិភពលោក។