គ្រោះទឹកជំនន់ធ្ងន់ធ្ងរបានវាយប្រហារភាគខាងលិចប្រទេសយេម៉ែន សម្លាប់មនុស្ស ៦០នាក់ និង២៦៨,០០០នាក់ រងផលប៉ះពាល់ ចាប់តាំងពីចុងខែកក្កដាមក ខណៈ២៤នាក់ផ្សេងទៀតកំពុងបាត់ខ្លួន
ភ្លៀងធ្លាក់ខ្លាំងបង្កជាទឹកជំនន់ធ្ងន់ធ្ងរ បានវាយប្រហារខេត្តភាគខាងលិចប្រទេសយេម៉ែន បណ្តាលអោយមានមនុស្សស្លាប់កើនឡើតរហូតដល់ ៦០នាក់ និងមនុស្ស ២៦៨,០០០នាក់ បានរងផលប៉ះពាល់ ចាប់តាំងពីចុងខែកក្កដាមក។ នេះបើយោងតាមអង្គការសហប្រជាជាតិ ដកស្រង់ផ្សាយដោយសារព័ត៌មាន Al Jazeera នៅថ្ងៃទី២៩ ខែសីហា ឆ្នាំ២០២៤។
ខេត្តភាគខាងលិចប្រទេសយេម៉ែន ងាយនឹងមានភ្លៀងធ្លាក់ខ្លាំងតាមរដូវ។ អាជ្ញាធរបាននិយាយថា កាលពីម្សិលមិញភ្លៀងធ្លាក់យ៉ាងគំហុកបង្កជាទឹកជំនន់ បានវាយប្រហារខេត្ត al-Mahwit ដែលជាខេត្តមួយស្ថិតនៅភាគខាងលិចនៃរដ្ឋធានី Sanaa គ្រប់គ្រងដោយក្រុម Houthi បានបណ្តាលមានមនុស្សយ៉ាងហោចណាស់ ២៤នាក់បាត់ខ្លួន។
ទូរទស្សន៍ Al Masirah បានរាយការណ៍ថា រថយន្តសង្គ្រោះបន្ទាន់ជាច្រើនមកពីតំបន់ជិតខាងក្នុង al-Mahwit ក៏ដូចជាខេត្ត Hodeidah ត្រូវបានបញ្ជូនទៅកាន់តំបន់ដើម្បីជួយក្នុងកិច្ចខិតខំប្រឹងប្រែងជួយសង្គ្រោះ។
គួរជម្រាបថា អង្គការសុខភាពពិភពលោក (WHO) បានព្យាករណ៍ដោយព្រមានថា នៅក្នុងប៉ុន្មានខែខាងមុខនេះ ការកើនឡើងទឹកភ្លៀងដោយតំបន់ខ្ពង់រាបកណ្តាល តំបន់ឆ្នេរក្រហម និងផ្នែកខ្លះនៃតំបន់ខ្ពង់រាបភាគខាងត្បូង នឹងទទួលបានកម្រិតដែលមិនធ្លាប់មានពីមុនមក លើសពី ៣០០មម (១២ អ៊ីញ) នៅសប្តាហ៍នេះ៕
