Hayat Al-Sindi គឺជាវិទ្យាសាស្ត្រស្ត្រីអារ៉ាប់ដំបូងគេ ដែលក្លាយជាអ្នកច្នៃប្រឌិត និងអ្នកដឹកនាំដ៏ធំក្នុងវិស័យវិទ្យាសាស្ត្រ

លោកស្រី Dr. Hayat Al-Sindi កើតនៅ ថ្ងៃទី៦ ខែវិច្ឆិកា ឆ្នាំ១៩៦៧ ក្នុងទីក្រុង មាក្កះនៃប្រទេសអារ៉ាប៊ីសូឌីត។ គាត់បានមានឱកាសចាកចេញទៅសិក្សានិងបណ្តុះបណ្តាលផ្នែកភាសាសអង់គ្លេសនៅប្រទេសអង់គ្លេសក្នុងឆ្នាំ 1991។ បន្ទាប់ពីរៀនភាសានិង A-levels ត្រឹមពេលពីរឆ្នាំ លោកស្រី Hayat Al sindi បានចូលរៀននៅ King’s College London, សិក្សាផ្នែក Pharmacology ហើយបញ្ចប់ដ៏ជោគជ័យក្នុងឆ្នាំ 1995 ។

ក្នុងឆ្នាំ 2001 គាត់ក្លាយជាស្ត្រីអារ៉ាប់ដំបូងបំផុតម្នាក់ដែលត្រូវទទួលបាន PhD ផ្នែក Biotechnology នៅ Newnham College, Cambridge University និងក្លាយជាស្ត្រីទីមួយមកពីប្រទេសអារ៉ាប់ដែលបានបញ្ចប់សញ្ញាបត្របណ្ឌិតក្នុងផ្នែកនេះ។ លោកស្រីក៏បានបន្តការស្រាវជ្រាវនៅ MIT និង Harvard រហូតអាចបង្កើតបានឧបករណ៍វិជ្ជសាស្ត្រសំខាន់ៗជាច្រើន ដែលបានជួយទៅពលរដ្ឋស្ថិតនៅប្រទេសក្រីក្រជាច្រើន ខណៈឧបករណ៍របស់លោកស្រីត្រូវបានប្រើប្រាស់និងពេញនិយមរហូតមកដល់បច្ចុប្បន្ន។

ជាក់ស្តែង ឧបករណ៍ និងបច្ចេកវិទ្យាសំខាន់ៗដែលលោកស្រីបានរកឃើញ និងបង្កើតឡើងមានដូចជា៖ ឧបករណ៍វេជ្ជសាស្ត្រថោកសម្រាប់តេស្តឈាម និងរាងកាយ, ផលិតជាបន្ទះក្រដាសតូចៗ អាចប្រើត្រឹមតែឈាមបន្តិចដើម្បីរកជំងឺដូចជា ទឹកនោមផ្អែម, ជំងឺក្រិនសរសៃឈាម, អាស៊ីតខ្លាញ់ ដែលមានតម្លៃសមរម្យ ងាយស្រួលដឹកជញ្ជូន, មិនចាំបាច់មានឧបករណ៍ធំៗពិនិត្រ ឬពិសោធន៍។
បច្ចេកវិទ្យាដែលប្រើសម្រាប់ពិនិត្យមើលសុខភាព ដោយអាចប្រើក្នុងវេជ្ជសាស្ត្រសម្រាប់កំណត់រោគរហ័ស។ ក្នុងនោះ រាល់ការផលិតឧបករណ៍ត្រួតពិនិត្យជំងឺរបស់លោកស្រី គឺអាចប្រើក្នុង តំបន់ជនបទឆ្ងាយ ដែលគ្មានមន្ទីរពិសោធន៍។

លោកស្រី Hayat Al-Sindi មិនត្រឹមតែជាអ្នកវិទ្យាសាស្ត្រដ៏ឆ្នើមទេ ប៉ុន្តែជាអ្នកច្នៃប្រឌិតនូវឧបករណ៍ ថោក តូច ងាយប្រើ ដែលអាចជួយអ្នកជំងឺរាប់លាននាក់នៅតំបន់ក្រីក្រ។ ហើយគាត់ក៏បានបង្ហាញឲ្យពិភពលោកឃើញថា ស្ត្រីឥស្លាមអាចក្លាយជាអ្នកច្នៃប្រឌិត និងអ្នកដឹកនាំដ៏ធំក្នុងវិស័យវិទ្យាសាស្ត្រ និងសង្គម។ ហើយគាត់ក៏ត្រូវបានគេចាត់ទុកជាស្ត្រីមូស្លីមដែលបង្កើតឥទ្ធិពល និងជាគំរូសម្រាប់ស្ត្រីនៅអារ៉ាប់ និងទូទាំងពិភពលោក។ គាត់ជាអ្នកលើកស្ទួយក្តីស្រមៃ សិទ្ធិ និងឱកាសស្មើភាពសម្រាប់ស្ត្រីក្នុងវិទ្យាសាស្ត្រ និងបច្ចេកវិទ្យា។ ការចូលរួមរបស់លោកស្រីជាមួយ UNESCO និងអង្គការអន្តរជាតិជាច្រើន បានផ្ដល់កម្លាំងឲ្យស្ត្រីមូស្លីមទូទាំងពិភពលោកផ្សេងទៀតមានកម្លាំងក្នុងការចូលរួមសង្គម និងជាផ្លូវសម្រាប់ក្មេងៗជំនាន់ក្រោយ។