ពិធីចុះហត្ថលេខាលើកិច្ចព្រមព្រៀងផ្តល់មូលនិធិគម្រោងអាហារូបករណ៍ រវាងអង្គការ ណូវែលលីអ៊ុបទិក ប្រទេសបារាំង ជាមួយសាកលវិទ្យាល័យកម្ពុជា គ្រប់គ្រង និងបច្ចេកវិទ្យា

នាព្រឹកថ្ងៃទី១៥ ខែមិថុនា ឆ្នាំ២០២៣ នៅសាកលវិទ្យាល័យកម្ពុជា គ្រប់គ្រង និងបច្ចេកវិទ្យា ហៅកាត់ CUMT បានរៀបចំពិធីចុះហត្ថលេខាលើកិច្ចព្រមព្រៀងផ្តល់មូលនិធិគម្រោងអាហារូបករណ៍ រវាងអង្គការណូវែលលីអ៊ុបទិក ប្រទេសបារាំង ជាមួយសាកលវិទ្យាល័យកម្ពុជា គ្រប់គ្រង និងបច្ចេកវិទ្យា ក្រោមអធិបតីភាព ឯកឧត្តមបណ្ឌិត ហូសេន មហាម៉ាត់ហ្វារីត ប្រធានក្រុមប្រឹក្សាភិបាលសាកលវិទ្យាល័យកម្ពុជា គ្រប់គ្រង និងបច្ចេកវិទ្យា និងលោក Hossein Roumi, ប្រធានអង្គការ អង្គការណូវែលលីអ៊ុបទិក (Novelle Optique) ដែលមានទីស្នាក់នៅសាធារណៈរដ្ឋបារាំង។ នៅក្នុងរបាយការណ៍ស្វាគមន៍ ឯកឧត្តមបណ្ឌិត ហូសេន មហាម៉ាត់ហ្វារីត ប្រធានក្រុមប្រឹក្សាភិបាលសាកលវិទ្យាល័យកម្ពុជា គ្រប់គ្រង និងបច្ចេកវិទ្យា បានថ្លែងអំណរគុណយ៉ាងជ្រាលជ្រៅជូនចំពោះលោក Hossein Roumi, ប្រធានអង្គការណូវែលលីអ៊ុបទិក (Novelle Optique) ព្រមទាំងសប្បុរសជនទាំងអស់ដែលតែងតែផ្តល់ជំនួយ ក្នុងការកសាងជាអណ្តូងទឹក និងសាលារៀនជាច្រើនក្នុងប្រទេសកម្ពុជា។

ឯកឧត្តមបណ្ឌិត បានបន្ថែមថា គិតមកទល់ពេលនេះ អង្គការណូវែលលីអ៊ុបទិក បានជួយកសាងអណ្តូងទឹកជូនដល់ប្រជាពលរដ្ឋក្រក្រីបានចំនួន ជាងដប់ម៉ឺនអណ្តូង និងសាលារៀនជាច្រើនទៀត ហើយបានចំណាយថវិកា ជាងមួយលានដុល្លារអាមេរិក ដើម្បីផ្តល់នូវភាពងាយស្រួលដល់ប្រជាជន ដែលមានជីវភាពខ្វះខាតក្នុងការប្រើប្រាស់ទឹក និងបញ្ជូនកូនទៅរៀនសូត្របន្តនៅតាមមូលដ្ឋានរបស់ខ្លួន។