A Palestinian woman gestures as others flee the eastern part of Khan Younis after they were ordered by Israeli army to evacuate their neighborhoods, amid Israel-Hamas conflict, in Khan Younis in the southern Gaza Strip July 22, 2024. REUTERS/Hatem Khaled
ពលរដ្ឋប៉ាឡេស្ទីន ៧០នាក់ត្រូវបានសម្លាប់ និងជាង២០០នាក់រងរបួសនៅហ្គាហ្សា ក្នុងការវាយប្រហារជាថ្មីនៅទីក្រុង Khan Younis ពីសំណាក់អ៊ីស្រាអែល
ក្រុមគ្រូពេទ្យនៅតំបន់ហ្គាហ្សា បាននិយាយកាលពីថ្ងៃចន្ទ ដែលដកស្រង់ផ្សាយដោយសារព័ត៌មាន Al Jazeera ថា មនុស្ស៧០នាក់ត្រូវបានសម្លាប់ និងជាង ២០០នាក់របួស ក្នុងការវាយប្រហារពីសំណាក់អ៊ីស្រាអែល នៅទីក្រុង Khan Yunis។ ប្រជាជនប៉ាឡេស្ទីនទាំងនោះត្រូវបានសម្លាប់ដោយសាររថក្រោះបើកការបាញ់ប្រហារនៅក្នុងតំបន់ បានី ស៊ូហៃឡា (Bani Suhaila) និងផ្នែកផ្សេងទៀតដែលនៅភាគខាងកើតនៃទីក្រុង ខាន់យូនីស និងការទម្លាក់គ្រាប់បែកពីលើអាកាស។
ការវាយប្រហាររបស់អ៊ីស្រាអែល បន្ទាប់ពីបទបញ្ជាជម្លៀសភ្លាមៗអោយពលរដ្ឋប៉ាឡេស្ទីនចេញពីតំបន់ ដែលខ្លួនបាននិយាយថា វាត្រូវបានប្រើប្រាស់សម្រាប់ការវាយប្រហារជាថ្មីដោយពួកសកម្មប្រយុទ្ធ។ នៅក្នុងសេចក្តីថ្លែងការណ៍មួយ យោធាអ៊ីស្រាអែលបាននិយាយថា ការបញ្ជាជម្លៀសនៅតំបន់ ខាន់យូនីស ភាគខាងកើតនេះ ដោយសារតែមានព័ត៌មានស៊ើបការណ៍ដែលបង្ហាញថា ក្រុមសកម្មប្រយុទ្ធកំពុងបាញ់រ៉ូកែតចេញពីតំបន់ទាំងនោះ ហើយក្រុមហាម៉ាស កំពុងព្យាយាមប្រមូលផ្តុំឡើងវិញ។
គួរជម្រាបថា Khan Yunis ត្រូវបានវាយប្រហារយ៉ាងខ្លាំងក្លារួចហើយកាលពីដើមឆ្នាំនេះ។ ការប្រយុទ្ធគ្នាឥតឈប់ឈរបានធ្វើឱ្យតំបន់ហ្គាហ្សាធ្លាក់ចូលទៅក្នុងវិបត្តិមនុស្សធម៌ធ្ងន់ធ្ងរ ដែលអង្គការសុខភាពពិភពលោកបាននិយាយថា ដូចជាឋាននរក។ យុទ្ធនាការយោធាសងសឹករបស់អ៊ីស្រាអែលនៅតំបន់ហ្កាហ្សា បន្ទាប់ពីហេតុការណ៍ថ្ងៃទី៧ ខែតុលា បានសម្លាប់ជនជាតិប៉ាឡេស្ទីនរហូតដល់ជាង ៣៩,០០០នាក់ ដែលក្នុងនោះភាគច្រើនជាស្ត្រី និងកុមារ៕
