នាយករដ្ឋមន្រ្តីម៉ាឡេស៊ី អាន់វ៉ា អ៊ីប្រាហ៊ីមប្រកាសថ្កោលទោសអាម៉េរិក ប្រើកម្លាំងយោធាចាប់ខ្លួនលោក នីកូឡាស ម៉ាឌូរ៉ូ ជាការរំលោភច្បាប់អន្តរជាតិធ្ងន់ធ្ងរ និងបំផ្លាញសណ្ដាប់ធ្នាប់ពិភពលោក

ម៉ាឡេស៊ី៖ នាយករដ្ឋមន្រ្តីម៉ាឡេស៊ី លោកអាន់វ៉ា អ៊ីប្រាហ៊ីម នៅថ្ងៃ០៤ មករា នេះបានបង្ហោះសារក្នុងបណ្ដាញសង្គមហ្វេកប៊ុករបស់លោកដោយធ្វើការថ្កោលទោសយ៉ាងខ្លាំង ចំពោះប្រតិបត្តការយោធាសហរដ្ឋអាម៉េរិក ធ្វើការចាប់ខ្លួនលោក នីកូឡាស ម៉ាឌូរ៉ូ និងភរិយា កាលពីពាក់កណ្ដាលយប់ថ្ងៃ៣មករា ដោយចាត់ទុកសកម្មភាពនេះជាការរំលោភបំពានច្បាប់អន្តរជាតិយ៉ាងធ្ងន់ធ្ងរ នៅក្នុងដែនអធិបតេយ្យរបស់រដ្ឋមួយ។ លោកអំពាវនាវឱ្យមានការដោះស្រាយក្នុងតុចរចារ ប្រកបដោយសន្តិវិធីរវាងភាគីទាំងពីរ ដោយទុកសិទ្ធិសម្រេចជោគវាសនាប្រទេសដល់ពលរដ្ឋវេណេស៊ុយអេឡាដែលជាម្ចាស់ប្រទេសវិញ ជាជាងការអន្តរាគមន៍ដោយប្រតិបត្តការយោធាពីរដ្ឋបរទេសដទៃ។