ត្រឹមរយៈពេល៥ខែនៃឆ្នាំ២០២៣នេះ ជនជាតិប៉ាឡេស្ទីនចំនួន ១៦០នាក់ ត្រូវបានសម្លាប់ពីសំណាក់អ៊ីស្រាអែល ក្នុងទឹកដីប៉ាឡេស្ទីន ដែលកាន់កាប់ដោយអ៊ីស្រាអែល

ប៉ាឡេស្ទីន៖ ក្រសួងសុខាភិបាលប៉ាឡេស្ទីន បាននិយាយកាលពីម្សិលមិញថា អ៊ីស្រាអែលបានសម្លាប់ជនជាតិប៉ាឡេស្ទីនចំនួន ១៦០នាក់ ត្រឹមរយៈពេល៥ខែនៃឆ្នាំ២០២៣ ហើយក្នុងនោះមានទាំងស្ត្រី និងកុមារផងដែរ។ នេះបើតាមការផ្សាយដោយសារព័ត៌មាន Middle East នៅថ្ងៃទី២៤ ខែឧសភា ឆ្នាំ២០២៣។

តួរលេខនេះរាប់បញ្ចូលទាំងបុរសទាំងបីនាក់ដែលត្រូវបានសម្លាប់ក្នុងអំឡុងការវាយឆ្មក់លើជំរុំជនភៀសខ្លួន Balata ក្នុងទីក្រុង Nablus តំបន់វេសប៊ែង ទឹកដីប៉ាឡេស្ទីន ដែលកាន់កាប់ដោយអ៊ីស្រាអែល កាលពីយប់ថ្ងៃអង្គារ។

បើតាមទិន្នន័យរបស់ក្រសួងសុខាភិបាលប៉ាឡេស្ទីន មនុស្សចំនួន៣៦នាក់ ត្រូវបានសម្លាប់ នៅតំបន់ហ្គាហ្សាស្ទ្រីប ដែលត្រូវបានឡោមព័ទ្ធ ចំនួន១២០នាក់ ត្រូវបានសម្លាប់នៅតំបន់វេសប៊ែង ទឹកដីប៉ាឡេស្ទីន ដែលកាន់កាប់ដោយអ៊ីស្រាអែល និង ៤នាក់ផ្សេងទៀត ត្រូវបានសម្លាប់នៅអ៊ីស្រាអែល។
កាលពីដើមខែឧសភា អ៊ីស្រាអែលបានបញ្ចប់ការវាយលុករយៈពេលប្រាំថ្ងៃលើតំបន់ហ្គាហ្សា ដែលបានសម្លាប់មនុស្ស ៣៣នាក់ ក្នុងនោះមានស្ត្រី ៣នាក់ និងកុមារ ៦នាក់។

ការវាយឆ្មក់របស់អ៊ីស្រាអែលលើទីប្រជុំជន និងទីក្រុងប៉ាឡេស្ទីននៅតំបន់វេសប៊ែង ដែលកាន់កាប់ដោយអ៊ីស្រាអែល បានកើតមានឡើងស្ទើរតែពេញមួយយប់ ហើយបាននាំឱ្យមានការស្លាប់ភាគច្រើន។ ពួកគេត្រូវបានភ្ជាប់ជាមួយនឹងការប្រមាថប្រចាំថ្ងៃនៃវិហារអ៊ីស្លាម Al-Aqsa និងការរឹតបន្តឹងលើចលនាដែលដាក់លើជនជាតិប៉ាឡេស្ទីន នៅក្នុងទឹកដីរបស់ខ្លួន ក្រោមការកាន់កាប់របស់អ៊ីស្រាអែល។

គួរជម្រាបថា អ៊ីស្រាអែលគឺកើតចេញពីចលនាអន្តោប្រវេសន៍របស់ជនជាតិជ្វីហ្វ នៅសតវត្សរ៍ទី១៩ ដើម្បីចូលទៅតាំងទីលំនៅនៅក្នុងទឹកដីប៉ាឡេស្ទីន និងបានពង្រីកការកាន់កាប់របស់ខ្លួនជាបន្តបន្ទាប់ ក្រោមការគាំទ្រពីសំណាក់ប្រទេសមហាអំណាចពិភពលោក។

ហើយជានិច្ចកាល អ៊ីស្រាអែលតែងធ្វើទុក្ខបុកម្នេញ និងសម្លាប់ប្រជាជនប៉ាឡេស្ទីន ដោយមិនមានការអន្តរគមន៍ណាមួយពីសំណាក់សហគមន៍អន្តរជាតិនោះឡើយ៕