សាលារៀនសុវណ្ណភូមិ ទីតាំងតាខ្មៅទី៣ ត្រូវបានសម្ពោធជាផ្លូវការក្រោមអធិបតីភាព លោកឧកញ៉ា ជាធីឡាយ អគ្គនាយក អ៊ិនធីសុីគ្រុប

សាលារៀនសុវណ្ណភូមិតាខ្មៅទី៣ដែលមាន អគារសិក្សាថ្មីមានទំហំធំទូលាយ និងបរិយាកាសសមស្របសម្រាប់ការសិក្សាស្រាវជ្រាវរបស់សិស្សានុសិស្សត្រូវបានសម្ពោធជាផ្លូវការក្រោមអធិបតីភាពលោកឧកញ៉ា ជា ធីឡាយ អគ្គនាយក និងជាស្ថាបនិកស្ថាប័នអប់រំ អ៊ិនធីស៊ីគ្រុប (NTC Group) នាព្រឹកថ្ងៃទី២៨ខែវិច្ឆិកាឆ្នាំ២០២៥។ពិធីនេះក៏វត្តមានរបស់ឯកឧត្តម លោកជំទាវ លោក លោកស្រី ភ្ញៀវជាតិ និងអន្តរជាតិ តំណាងស្ថាប័ពាក់ព័ន្ធ ថ្នាក់ដឹកនាំ បុគ្គលិក លោកគ្រូអ្នកគ្រូ អាណាព្យាបាលនិងសិស្សានុសិស្សយ៉ាងច្រើនកុះករផងដែរ។

ក្នុងឱកាសដ៌វិសេសវិសាលនេះ លោកឧកញ៉ា ជា ធីឡាយ បានសំដែងនូវមនោសញ្ចេតនា សប្បាយរីករាយយ៉ាងក្រៃលែង ដែលបានចូលរួមក្នុងពិធីសម្ពោធសាលារៀនសុវណ្ណភូមិ ទីតាំងតាខ្មៅទី៣ នៅពេលនេះ។ លោកឧកញ៉ាបន្តថា សាលារៀនសុវណ្ណភូមិទីតាំងតាខ្មៅទី៣នេះមានអគារសិក្សាថ្មីដ៏ស្កឹមស្កៃ និងធំទូលាយហើយ វត្តមានសាលារៀនសុវណ្ណភូមិ ទីតាំងតាខ្មៅទី៣នេះ គឺបានបង្ហាញពីការយកចិត្តទុកដាក់ខ្ពស់ របស់ថ្នាក់ដឹកនាំគ្រប់លំដាប់ថ្នាក់ នៃសាលារៀនសុវណ្ណភូមិ ទៅលើវិស័យអប់រំ ដើម្បីចូលរួមអភិវឌ្ឍធនធានមនុស្សនៅក្នុងព្រះរាជាណាចក្រកម្ពុជា។

ជាមួយគ្នានេះដែរ លោកឧកញ៉ាបានអំពាវនាវបន្ថែម ដល់បុគ្គលិកគ្រប់សេវាកម្មទូទាំងប្រទេស ជាពិសេសនៅទីតាំងតាខ្មៅទី៣នេះផ្ទាល់ សូមប្រកាន់ខ្ជាប់នូវការឆ្លើយតបតម្រូវការ និងសំណូមពររបស់អ្នកអាណាព្យាបាល ឱ្យបានលឿន និងកាន់តែប្រសើរគ្រប់ផ្នែកទាំងអស់ នៃសេវាកម្មរបស់សាលារៀនសុវណ្ណភូមិ ពង្រឹងលើគុណភាពសិក្សា ដើម្បីធានាឱ្យបានថា ក្មួយៗសិស្សានុសិស្សពិតជាមានសមត្ថភាពពេញលេញ ឆ្លើយតបទៅនឹងសរសរស្តម្ភនៃការអប់រំ (មានចំណេះដឹង ចំណេះធ្វើ ពលរដ្ឋល្អ និងកាយសម្បទារឹងមាំ) ដាក់ចិត្ត ដាក់កាយ និងតាំងខ្លួនជាមាតាបិតាទី២សម្រាប់គ្រប់សិស្សទាំងអស់ផ្តល់ក្តីស្រឡាញ់ដល់សិស្សស្មើៗគ្នាប្រៀបដូចជាកូនបង្កើតរបស់ខ្លួន។
មិនតែប៉ុណ្ណោះ ថ្នាក់ដឹកនាំ និងបុគ្គលិកគ្រប់ផ្នែក ជាពិសេសលោកគ្រូ អ្នកគ្រូ កុំភ្លេចត្រូវអភិវឌ្ឍសមត្ថភាពខ្លួនជាប្រចាំ ដើម្បីបង្កើនចំណេះដឹង និងសមត្ថភាពទៅតាមតួនាទីរៀងៗខ្លួន ឱ្យស្របទៅនឹងបរិបទរីកចម្រើននៃសម័យបច្ចេកវិទ្យា ព្រោះថា ការអភិវឌ្ឍសមត្ថភាព ជាកម្លាំងចលករមួយយ៉ាងសំខាន់ សម្រាប់ការអភិវឌ្ឍធនធានមនុស្ស។

គួរជម្រាបថា សាលារៀនសុវណ្ណភូមិ គឺជាគ្រឹះស្ថានអប់រំចំណេះដឹងទូទៅមួយដែលមានឈ្មោះល្បី ហើយប្តេជ្ញាចិត្តផ្ដល់នូវការអប់រំមានគុណភាពខ្ពស់ ដល់កុមារ និងយុវជនក្នុងការចូលរួមរួមចំណែកអភិវឌ្ឍន៍វិស័យអប់រំនៅកម្ពុជា និងកសាងធនធានមនុស្សដែលប្រកបដោយមានចំណេះដឹង សីលធម៌ និងវិន័យល្អ។បច្ចុប្បន្នសាលាមានសាខាជាច្រើននៅទូទាំងប្រទេស។